Hvolparnir stækka eins og við er að búast en Brá er ennþá dugleg að sinna þeim og þrífa upp eftir þá. Það væri óskandi að veðrið færi að skána svo það sé hægt að leyfa þeim að kíkja út að leika. Norðlenskur vetur er ekki uppáhalds þessa dagana. 

​Það verður að viðurkennast að ég hef ekki verið að standa mig í fréttaflutningi! Það fæddust hér hvolpar fyrir 4 vikum síðan en núna er ég loksins búin að uppfæra heimasíðuna.

Brá kom mér heldur á óvart í þetta skiptið en ég hafði síður búist við stóru goti frá henni. Þegar fyrsti hvolpur mætti á svæðið gerði ég mér strax grein fyrir því að mér skjátlaðist líklega, sennilega væri hellingur eftir. Brá er orðin 7 ára og er heldur betur frjósöm en hvolparnir urðu 8 talsins, eins og í síðasta goti. Í þetta skiptið voru rakkarnir heldur fleiri en þeir eru sex og tíkurnar tvær. Ég hef verið svo lánsöm að hafa ekki misst hvolp hingað til en 8 hvolpar eru heldur mikið fyrir tíkina og þarf því að passa vel upp á að allir fái nóg og hef ég þurft að gefa þeim ábót eftir þörfum. Fyrstu vikurnar hafa því verið annasamar en nú eru hvolparnir farnir að éta mat og munu klárlega láta hafa fyrir sér næstu vikurnar, en á annan hátt. 

Hvolparnir eru fjörugir og verður áhugaverðarar að fylgjast með þeim með hverjum deginum. Önnur tíkin er svört og hvít og svipar mjög til Nap en hin tíkin er blue merle og minnir mikið á mömmu sína. Rakkarnir eru þrír svartir og þrír blue merle, og sumir þeirra þrílitir. Þess má geta að Brá er beri fyrir mórauðum lit og því ætti ca. helmingur hvolpanna að bera mórautt. 

Ég hef fengið þónokkuð af fyrirspurnum um hvolpana en ég er ekki farin að festa ákveðna hvolpa ennþá þar sem þeir eru enn það ungir. Ég vil að þeir hvolpar sem sýnast vera efnilegastir í fé komist í réttar hendur á þeim vettvangi. Einnig á ég mér þann draum að sjá hunda frá mér í björgunarsveitunum og ég krossa putta og vona að það gerist einn daginn. Ég hef sjálf áhuga á að þjálfa hund til leitar en það verkefni verður að vera á "to do listanum" mínum eitthvað áfram. Annars býst ég ekki við öðru en að þessir hvolpar verði frábærir félagar fyrir þá sem geta veitt þeim nægan tíma og verkefni. Það eru enn hvolpar á lausu og tek ég vel á móti fyrirspurnum, það skiptir mig mestu máli að hundarnir fari í góðar hendur. 

Hvolparnir eru mis miklar ljósmyndafyrirsætur en ég reyni að bæta úr því næstu dagana. Hvolparnir eru orðnir 4 vikna og núna fer þetta að verða skemmtilegt! 

Enn stækka hvolparnir á ógnarhraða og bræða alla sem þá hitta. Nú er ferldgerð að skýrast sem og augnlitur. Í gotinu eru bæði snöggir og loðnir hvolpar sem er mjög skemmtilegt. Brá og Prince eru bæði með smooth feld (snögg) sem er afskaplega þægilegt þegar maður er í sveit og hundarnir eiga það til að vera alltaf blautir og skítugir. Ég sé stóran mun á Brá og svo aussie tíkinni okkar, henni Nótt, sem er loðin, Brá er alltaf hrein og ber lítið inn af bleytu og sandi en Nótt er aftur á móti alltaf blaut og skitug. Þó er líka gaman að eiga loðinn Border Collie, þeir hafa til dæmis meiri séns, ef manni dytti í hug að mæta með vinnuhundinn sinn í sýningarhringinn. Reyndar er Brá mín mjög falleg og ég stefni á að sýna hana á sýningu hjá HRFÍ við tækifæri, bara svona að gamni. Hún er auðvitað fyrst og fremst vinnuhundur.
 
Allir merle hvolparnir eru með blátt í augum, ég er ekki alveg örugg á því enn hvort augun eru alblá eða að hluta. Svo er ég enn að fylgjast með hinum hvolpunum, ég útiloka ekki að það séu fleiri blá augu í hópnum. 

Eins eru nöfnin á hvolpana klár, að því gefnu að aðrir heimilismenn samþykki þau. Nánar um það síðar.

Ég var að setja inn nýjar myndir á hvolpasíðuna.

Þá eru hvolparnir undan Brá og Prince orðnir þriggja vikna. Þeir blása út og eru farnir að verða fjörugir. Ég var að bæta inn myndum af þeim á hvolpasíðuna þeirra, sjá nánar hér

Litlu hvolpaskottin eru orðin 6 daga gömul og þyngjast vel. Ég tók af þeim nokkrar myndir í dag, svona áður en þeir stækka enn meira og verða ekki lengur kjurrir fyrir myndatöku. Ég er að vinna í nöfnunum á þeim, ég er búin að vera með ákveðið þema í huga síðan þeir fæddust en það er eitthvað svo erfitt að ákveða sig endanlega. Heimasætan er líka farin að skipta sér af nafngiftinni og er farin að nefna þá sjálf. Ég þarf eiginlega að drífa mig að skella á þeim nafni áður en hún verður búin að skíra þá alla :)

Ég verð víst að viðurkenna að ég er ekki búin að standa mig í fréttaflutningi á síðustu misserum. Ég ætla þó að reyna að bæta úr því. 

Ég smelli hér inn gömlum fréttum sem ég sé að rötuðu inn á Facebook síðuna okkar á sínum tíma en ekki hingað inn. 

Hvolpasýning HRFÍ var í gær (júní 2017) í blautu veðri en allir skemmtu sér samt vel. Í dag er svo Reykjavík Winner og Alþjóðleg sýning á morgun.
​
Í gær varð Mánaskálar Vetrar Harka var besti hvolpur tegundar í eldri hvolpaflokk og Mánaskálar Vetrar Kuldi varð besti hvolpur af gagnstæðu kyni. Bæði fengu heiðursverðlaun og mjög góðar umsagnir.

Mánaskálar Vetrar Stormur og Mánaskálar Vetrar Myrkvi mættu einnig og stóðu sig með sóma. Fengu góðar umsagnir og eigendurnir stóðu sig vel sem sýnendur í erfiðum aðstæðum.
Ég hlakka til frekari sýninga með Mánaskálar genginu!
​
Móðir hvolpanna, RW-16 ISCh Heimsenda Sumar Nótt, er skráð á báðar sýningar sem slasaðist því miður í vikunni og gengur ekki heil til skógar. Við sendum því bara góðar kveðjur til þeirra sem eru á sýningunni í dag og óskum þeim góðs gengis :) Við mætum brátt aftur í sýningarhringinn :)

​Norðurljósa sýning HRFÍ fór fram í reiðhöllinni í Víðidal nú um helgina. Ég skráði allt Vetrar gotið til leiks og svo kæmi bara í ljós hvaða hundar gætu mætt. Hvolparnir urðu 3 mánaða daginn fyrir sýninguna og voru því yngstu keppendur sýningarinnar! 

Að þessu sinni voru 215 hvolpar skráðir á hvolpasýninguna og 660 hundar af um 94 tegundum, alls 875 hundar sem gerir þetta að stærstu sýningu í sögu félagsins! 

​Kuldi stóð sig rosalega vel í stóra hringnum en sýndi sig þó ekki jafn vel og fyrr um daginn enda var hann orðinn dauðþreyttur. Hann er bara 3. mánaða og hann var búinn að eiga langan dag allt frá bílferð að norðan um morguninn og þangað til hann lauk keppni um kl. hálf ellefu um kvöldið.